ສຶກ​ສາ​ອົບ​ຮົມ​ຜູ້​ສ້າງ​ຄວາມ​ເສຍ​ຫາຍ​ຜ່ານ​ສື່​ສັງ​ຄົມ​ອອນ​ລາຍ

​ໃນ​ຕອນ​ເຊົ້າ​ຂອງວັນ​ທີ 14 ກຸມ​ພາ 2020 ນີ້ ຢູ່​ທີ່ກອງ​ບັນ​ຊາ​ການ ປ​ກ​ສ ເມືອງວັງ​ວຽງ ໄດ້​ສຶກ​ສາ​ອົບ​ຮົມ ນາງ ທິດ​າ​ວັນ ຫຼື ຈ່ອຍ ອາ​ຊີບ ຄ້າ​ຂາຍ ຢູ່​ບ້ານ​ຫ້ວຍ​ສະ​ເຫງົ້າ ເມືອງວັງ​ວຽງ ແຂວງວຽງ​ຈັນ ຜູ້​ຖືກ​ຫາ​ຄະ​ດີ​ສ້າງ​ຄວາມ​ເສຍ​ຫາຍ​ຜ່ານ​ສື່​ສັງ​ຄົມ​ອອນ​ລາຍ ໂດຍ​ການ​ເຂົ້າ​ຮ່ວມ​ການ​ສຶກ​ສາ​ອົບ​ຮົມ​ຂອງ​ທ່ານ ພ​ັ​ທ ສູນ​ທອນ ໄຊ​ຍະ​ເດດ ຮອງກອງ​ບັນ​ຊາ​ການ ປ​ກ​ສ ເມືອງວັງ​ວຽງ, ທ່ານ ດ​ຣ ເພັດ​ສະ​ໝອນ ບູ​ລົມ​ມະ​ວົງ ຫົວ​ໜ້າ​ຫ້ອ​ງ​ການ​ສາ​ທາ​ລະ​ນະ​ສຸກ​ເມືອງ, ທ່ານ ສົມ​ຫວັງ ເພັດ​ຊົມ​ພູ ຫົວ​ໜ້າ​ຫ້ອງ​ການໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ ເມືອງ, ມີ​ອຳ​ນາດ​ການ​ປົກ​ຄອງ​ບ້ານ​ຫ້ວຍ​ສະ​ເຫງົ້າ ພ້ອມ​ດ້ວຍ​ຄອບ​ຄົວ ແລະ ຜູ້​ປົກ​ຄອງ​ຂອງ​ຜູ້​ກ່ຽວ​ເຂົ້າ​ຮ່ວມ. ເຊີ່ງ​ໃນ​ວັນ​ທີ 2-3 ກຸມ​ພາ 2020 ຜ່ານ​ມາ ນາງ ທິ​ດາ​ວັນ ຫຼື ຈ່ອຍ ໄດ້​ໂພ​ສ​ຂ່າວ​ລົງ​ທາງ​ເຟ​ສ​ບຸກ​ຂອງ​ຕົນ ແລະ ຖ່າຍ​ຄຼິບ​ເປັນ​ວີ​ດີ​ໂອ ແລະ ຂໍ້​ຄວາມ​ສຽງ ໂດຍ​ກ່າວ​ອ້າງວ່າ​ໄດ້​ມີ​ແມ່​ບ້ານ​ຄົນ​ໜຶ່ງ​ທີ່​ເຮັດ​ວຽກ​ຢູ່​ໂຮງ​ແຮມ​ແຫ່ງ​ໜຶ່ງ​ທີ່​ເມືອງວັງ​ວຽງ​ ບ່ອນ​ທີ່​ມີ​ຄົນ​ຈີນ​ໄປ​ພັກ​ເຊົາ, ຜູ້​ກ່ຽວ​ໄດ້​ຕິດ​ພະ​ຍາດ​ໂຄ​ໂລ​ນາ​ສາຍ​ພັນ​ໃໝ່​ປ່ວຍ​ໄປ​ປິ່ນ​ປົວ​ຢູ່​ໂຮງ​ໝໍ​ເມືອງວັງ​ວຽງ ປະ​ຈຸ​ບັນ​ໄດ້​ເສຍ​ຊີ​ວິດ​ແລ້ວ ພ້ອມ​ທັງ​ກ່າວ​ອ້າງວ່າ​ທາງ​ການ​ຂອງ​ເມືອງ​ໄດ້​ປິດ​ບັງ​ເລື່ອງ​ດັ່ງ​ກ່າວ​ໄວ້ ແລະ ໄດ້​ກ່າວ​ເຕືອນ​ໃຫ​້​ສັງ​ຄົມ​ຮູ້​ວ່າ​ພະ​ຍາດ​ດັ່ງ​ກ່າວ​ໄດ້​ເກີດ​ຂຶ້ນ​ຢູ່​ທີ່​ເມືອງວັງ​ວຽງ​ແລ້ວ ໃຜ​ເດີນ​ທາງ​ໄປ​ເມືອງວັງ​ວຽງ​ໃຫ້​ລະ​ມັດ​ລະ​ວັງ​ແດ່. ຈາກ​ນັ້ນ​ກໍ​ມີ​ຄົນ​ແຊ໌​ອອກ​ໄປ​ໃນ​ໂລກ​ໂຊ​ຊຽວ​ຢ່າງກວ້າງ​ຂວາງສ້າງ​ຄວາມ​ແຕກ​ຕື່ນ​ຕົກ​ໃຈ​ໄປ​ທົ່ວ​ເມືອງ.

ຕາມ​ການ​ຢັ້ງ​ຢືນ ແລະ ຊີ້​ແຈງ​ຂອງ​ທ່ານ​ຫົວ​ໜ້າ​ຫ້ອ​ງກ​ານ​ສາ​ທາ​ລະ​ນະ​ສຸກ​ເມືອງວັງ​ວຽງ ໃນ​ວັນ​ທີ 6 ກຸມ​ພາ 2020 ຜ່ານ​ມາ​ແມ່ນ​ບໍ່​ທັນ​ກວດ​ພົບ​ຜູ້​ປ່ວຍ​ທີ່​ຕິ​ດ​ເຊື້ອ​ພະ​ຍາດ​ດັ່​ງ​ກ່າວ​ແຕ່​ຢ່າງ​ໃດ, ສຳ​ລັບ​ຄົນ​ເຈັບ​ທີ່​ຜູ້​ກ່ຽວ​ໄດ້​ກ່າວ​ເຖິງ​ນັ້ນ​ແມ່ນ​ຄົນ​ເຈັບ​ທີ່​ເປັນ​ໄຂ້​ຫວັດ​ອັກ​ເສບ​ປອດ​ທຳ​ມະ​ດາ​ ເຊີ່ງ​ທາງ​ແພດ​ໝໍ​ເມືອງ​ໄດ້​ປິ່ນ​ປົວ​ຫາຍ​ດີ​ເປັນ​ປົກ​ກະ​ຕິ, ຜູ້​ກ່ຽວ​ໄດ້​ກັບ​ບ້ານ​ແລ້ວ.

ຕໍ່​ສະ​ພາບ​ດັ່ງ​ກ່າວ​ນີ້ ການ​ຈັດ​ຕັ້ງ​ຈຶ່ງ​ໄດ້​ໄປ​ກ່າວ​ເຕືອນ ນ. ທິ​ດາ​ວັນ ຫຼື ຈ່ອຍ ໃຫ້​ຜູ້​ກ່ຽວ​ລົບ​ຂ່າວ​ດັ່ງ​ກ່າວ​ອອກ​ຈາກ​ເຟ​ສ​ບຸກ​ຂອງ​ຕົນ​ພ້ອມ​ທັງ​ໃຫ້​ແກ້​ຂ່າວ​ຊີ້​ແຈງ​ໃຫ້​ສັງ​ຄົມ​ຄືນ. ແຕ່​ຜູ້​ກ່ຽວ​ບໍ່​ຍອມ​ປະ​ຕິບັດ ພ້ອມ​ທັງ​ເວົ້າຈາ​ທີ່​ບໍ​່​ສະ​ພາບ​ໃສ່​ການ​ຈັດ​ຕັ້ງ​ອີກ. ມາ​ຮອດ​ວັນ​ທີ 5 ກຸມ​ພາ 2020 ຜູ້​ກ່ຽວ​ຈຶ່ງ​ໄດ້​ຖືກ​ກັກ​ຕົວ. ຜ່ານ​ການ​ສຶກ​ສາ​ອົບ​ຮົມຈາກ​ຂະ​ແໜງ​ການ​ທີ່​ກ່ຽວ​ຂ້ອງ​ຂອງ​ເມືອງ ໂດຍ​ຍົກ​ໃຫ້​ເຫັນ​ຜົນ​ເສຍ​ຂອງ​ການ​ສ້າງ​ຂ່າວ​ທີ່​ບໍ່​ມີ​ມູນ​ຄວາມ​ຈິງ​ດັ່ງ​ກ່າວ​ໄດ້​ສົ່ງ​ຜົນ​ກະ​ທົບ​ໃຫ້​ແກ່​ພາບ​ຟົດ​ຂອງ​ການ​ທ່ອງ​ທ່ຽວ​ຢູ່​ພາຍ​ໃນ​ເມືອງບໍ່​ໜ້ອຍເຊີ່ງ​ຜືນ​ຈາກ​ລະ​ບຽບ​ກົດ​ໝາຍ​ບ້ານ​ເມືອງ ໂດ​ຍ​ສະ​ເພາະ​ແມ່ນ​ກົດ​ໝາຍ​ວ່າ​ດ້ວຍ ການ​ຕ້ານ ແລະ ສະ​ກັດ​ກັ້ນ​ອາ​ຊະ​ຍາ​ກຳ​ທາງ​ລະ​ບົບ​ຄອມ​ພິວ​ເຕີ ເປັນ​ການ​ສ້າງ​ພາບ​ຂ່າວ​ທີ່​ບໍ່​ມີ​ມູນ​ຄວາມ​ຈິງ. ພາຍຫຼັງ​ທີ່​ໄດ້​ຮັບ​ການ​ສຶກ​ສາ​ອົບ​ຮົມ ຜູ້​ກ່ຽວ​ໄດ້​ສະ​ແດງ​ຄວາມ​ກິນ​ແໜງ​ໃຈ​ຍ້ອນ​ຄວາມ​ຮູ້​ເທົ່າ​ບໍ່​ເຖິງ​ການ​ຂອງ​ຕົນ​ທີ່​ໄດ້​ສ້າງ​ຂ່າວ​ດັ່ງ​ກ່າວ​ຂຶ້ນ. ​ຕໍ່​ໜ້າ​ການ​ຈັດ​ຕັ້ງ, ຄອບ​ຄົວ ແລະ ຜູ້​ປົກ​ຄອງ​ ຜູ້​ກ່ຽວ​ໄດ້​ກ່າວ ແລະ ຂຽນ​ໃບ​ປະ​ຕິ​ຍານຍອມ​ຮັບ​ຄວາມ​ຜິດ​ຂອງ​ຕົນ​ທຸກ​ຢ່າງ ແລະ ຈະ​ບໍ່​ໃຫ້​ບັນ​ຫາ​ດັ່ງ​ກ່າວ​ເກີດ​ຂຶ້ນ​ອີກ​ໃນ​ຕໍ່​ໜ້າ, ເຊີ່ງ​ເປັນ​ບົດ​ຮຽນ​ໃນ​ຊີ​ວິດ​ໃຫ້​ແກ່​ຕົນ​ເອງ ແລະ ຕໍ່​ຜູ້​ທີ່​ໃຊ້​ສື່​ສັງ​ຄົມ​ອອນລາຍ​ທັງຫຼາຍ ກ່ອນ​ຈະ​ໂພ​ສ​ສະ​ແຊ​ຫຍັງ​ລົງ​ໄປ​ຕ້ອງ​ໄດ້​ພິ​ຈາ​ລະ​ນາ​ຕຶກ​ຕອງ​ໃຫ້​ຖີ່​ຖ້ວນ​ສາ​ກ່ອນ. ປະ​ຈຸ​ບັນ ນ. ທິ​ດາ​ວັນ ຫຼື ຈ່ອຍ ຄອບ​ຄົວ​​ຂອງຜູ້​ກ່ຽວ​ໄດ້​ປະ​ກັນ​ຕົວ​ໃຫ້​ອອກ​ໄປ​ພັກ​ຜ່ອນ​ຢູ່​ບ້ານ ເພື່ອ​ສືບ​ຕໍ່​ສຶກ​ສາ​ອົບ​ຮົມ​ໃຫ້​ເປັນ​ຄົນ​ດີ​ຂອງ​ສັງ​ຄົມ​ຕໍ່​ໄປ.