ຄວາມເປັນມາຂອງຖ້ຳລົມ

   ຖ້ຳ​ລົມ​ເປັນ​ສະຖານ​ທີ່​ແຫຼ່ງທ່ອງ​ທ່ຽວ​ແຫ່ງ​ໜຶ່ງ​ທີ່​ໄດ້​ຮັບ​ຄວາມ​ນິຍົມ​ຢູ່​ເມືອງ​ວັງ​ວຽງ​ໃນ​ປະຈຸ​ບັນຕັ້ງ​ຢູ່​ທາງ​ທິດ​​ເໜືອ​ຂອງ​ຕົວ​ເມືອງ​ເຂດ​ບ້ານ​ພູ​ດິນ​ແດງ ຫ່າງ​ຈາກ​ເສັ້ນທາງ​ເລກທີ 13 ​ເໜືອ ​ເຂົ້າ​ໄປ​ປະມານ 1 ກິ​ໂລ​ແມັດ. ບໍລິ​ເວນ​ນີ້​ໃນ​ເມື່ອ​ກ່ອນ​ໄດ້​ກາຍ​ເປັນ​ໄຮ່​ເປັນ​ສວນ​ຂອງ​ປະຊາຊົນ. ຕາມ​ການ​ບອກ​ເລົ່າຂອງ​ປະຊາຊົນ​ຜູ້​ທີ່​ເຄີຍ​ເຮັດ​ໄຮ່​ເຮັດ​ສວນ​ຢູ່​ຂອບ​ເຂດ​ບໍລິ​ເວນ​ນີ້​ໃຫ້​ຮູ້​ວ່າ: ການ​ໄດ້​ຊື່​ທີ່​ມາ​ຂອງ​ຖ້ຳ​ລົມ​ນັ້ນ​ຍ້ອນ​ຢູ່​ບໍລິ​ເວນ​ໜ້າຜາ​ແຫ່ງ​ນີ້​ໄດ້​ມີ​ຮູ​ຖ້ຳມີ​ສາຍ​ລົມ​ເຢັນ​ພັດ​ອອກ​ມາ​ເປັນ​ຮູດໆ ຢ່າງ​ບໍ່​ຂາດ​ສາຍ.
     ພາຍຫຼັງ​ແສງ​ພະ​ອາທິດ​ໄດ້​ດັບ​ລາ​ຈາກ​ຂອບ​ຟ້າ​ໄປ​ໃນ​ແຕ່​ລະ​ມື້ ​ຈະ​ມີ​ກະ​ແສ​ລົມ​ອ່ອນໆ ພັດ​ອອກ​ມາ​ຈາກ​ຮູ​ຖ້ຳ​ຢ່າງ​ບໍ່​ຂາດ​ສາຍ ​ແລະ ພັດ​ໄປ​ຕາມ​ແລວ​ສະ​ເພາະ​ຂອງ​ມັນ​ລຽບ​ຕີນ​ໜ້າຜາ​ລົງ​ທາງ​ທິດ​ໃຕ້. ຮອດ​ຍາມ​ເດິກ​ທ່ຽງ​ຄືນ​ຄວາມ​ຫງຽບ​ສະຫງັດ​ຂອງ​ລາຕີ​ການ ຖ້າ​ຜູ້​ໃດ​ຫາກ​ໄປ​ຢືນ​ຢູ່​ແລວ​ລົມ​ຈະ​ຖືກ​ກະ​ແສ​ລົມ​ພັດ​ດັງ​ວູ່ໆ​ເຢັນ​ຈົນ​ຂົນໜາວ​ລຸກ​ໄປ​ທົ່ວ​ເລົາ​ຄີງ. ຮອດ​ຂ້ອນ​ແຈ້ງ​ແສງ​ພະ​ອາທິດ​ໃກ້​ຈະ​ພົ້ນ​ຂື້ນ​ຈາກ​ຂອບ​ຟ້າ​ ສາ​ຍລົມ​ໄດ້​ອ່ອນ​ຕົວ​ລົງ ຈາກ​ນັ້ນ ກໍ​ຖືກ​ເຫືອດ​ຫາຍ​ໄປ​ພ້ອມ​ກັບ​ອາ​ລຸນ​ວັນ​ໃໝ່. ບໍລິ​ເວນ​ແຄມ​ຝັ່ງ​ຖ້ຳ​ລົມ​ໄດ້​ມີ​ສາຍ​ນ້ຳ​ຊອງ​ທີ່​​ໃສ​ເຢັນ​ໄຫຼ​ຜ່ານ ມີ​ວິວທຳ​ມະ​ຊາດ​ອັນ​ສວຍ​ສົດ​ງົດ​ງາມ​ກາຍ​ເປັນ​ຈຸດ​ນັດ​ພົບ​ຂອງ​ແຂກ​ຄົນ​ນັກ​ທ່ອງ​ທ່ຽວ​ທັງ​ພາຍ​ໃນ ​ແລະ ຕ່າງ​ປະ​ເທດ ​ເພື່ອ​ນັ່ງ​ຊົມ​ການ​ລ່ອງ​ກົງ​ເບັງ ​ແລະ ​ເຮືອ​ກາ​ຍັກ​ຂອງ​ນັກ​ທ່ອງ​ທ່ຽວ​ຕາມ​ສາຍ​ນ້ຳ​ຊອງ ​ເຊີ່ງ​ແຕ່​ລະ​ມື້​ມີ​ທັງ​ສາຍ​ລົມ​ທຳ​ມະ​ຊາດ​ພັດ​ອອກ​ມາ​ຈາກ​ຮູ​ຖ້ຳ ​ແລະ ມີ​ສຽງ​ໂອ້​ລົມ​ທັກ​ທາຍ​ມ່ວນ​ຊື່ນ​ເຮຮາ​ກັນ​ຂອງ​ແຂກ​ຄົນ​ຢ່າງ​ມາກ​ໜ້າ​ຫຼາຍ​ຕາ ຈຶ່ງ​ໄດ້​ຊື່​ທີ່​ມາ​ຂອງ “ຖ້ຳ​ລົມ” ມາ​ເຖິງ​ປະຈຸ​ບັນ. ສະຖານ​ທີ່​ແຫ່ງ​ນີ້​ໄດ້​ຮັບ​ການ​ພັດທະນາ​ເປັນ​ແຫຼ່ງທ່ອງ​ທ່ຽວ​ມາ​ແຕ່​ປີ 2002.