ກຳ​ມະ​ບານ​ຮາກ​ຖານ​ໂຮງ​ງານ​ຊີ​ມັງລາວວັງ​ວຽງ ຫຼັງ III ຮັບ​ສະ​ມາ​ຊິກ​ໃໝ່

​ໃນ​ຕອນ​ເຊົ້າ​ຂອງວັນ​ທີ 22 ກຸມ​ພາ 2020 ນີ້ ຢູ່​ທີ່​ໂຮງ​ງານ​ຊີ​ມັງ​ລາວ​ວັງ​ວຽງ ຫຼັງ III ໄດ້​ຈັດ​ພິ​ທີ​ຮັບ​ສະ​ມາ​ຊິກ​ກຳ​ມະ​ບານ​ໃໝ່ ໂດຍ​ການ​ເຂົ້າ​ຮ່ວມ​ພິ​ທີ​ຂອງ​ ສະ​ຫາຍ ບົວ​ສອນ ແກ້ວ​ປະ​ເສີດ ເລ​ຂາ​ໜ່ວຍ​ພັກ ຮອງ​ຫົວ​ໜ້າ​ໂຮງ​ງານ​ຊີ​ມັງ​ລາວ​ວັງ​ວຽງ ຫຼັງ III, ​ສະ​ຫາຍ ວົງ​ເພັດ ວົງ​ວຽງ​ແກ້ວ ປະ​ທາ​ນ​ກຳ​ມະ​ບານ​ຮາກ​ຖານ​ໂຮງ​ງານ​ຊີ​ມັງ​ລາວ​ວັງ​ວຽງ ຫຼັງ III, ມີ​ຄະ​ນະ​ພະ​ແນກ, ຕົວ​ແທນ​ອົງ​ການ​ຈັດ​ຕັ້ງ​ມະ​ຫາ​ຊົນ, ຄະ​ນະ​ກຳ​ມະ​ບານ​ຮາກ​ຖານ, ຫົວ​ໜ້າ ແລະ ຮອງ​ໜ່ວຍ​ກຳ​ມະ​ບານພາຍ​ໃນ​ໂຮງ​ງານ​ພ້ອມ​ດ້ວຍ​ສະ​ມາ​ຊິກ​ກຳ​ມະ​ບານ​ໃໝ່​ທັງ​ໝົດ​ເຂົ້າ​ຮ່ວມ.

ພາຍຫຼັງ ຕົວ​ແທນ​ມະ​ຫາ​ຊົນ​ຜູ້​ກ້າວ​ໜ້າ​ໄດ້​ຂຶ້ນ​ຜ່ານ​ໃບ​ສະ​ມັກ​ຂໍ​ເຂົ້າ​ເປັນ​ສະ​ມາ​ຊິກ​ກຳ​ມະ​ບານ​ແລ້ວ ຄະ​ນະ​ຈັດ​ຕັ້ງ​ພິ​ທີ​ກໍ​ໄດ້​ຜ່ານ​ຂໍ້​ຕົກ​ລົງ​ວ່າ​ດ້ວຍ: ການ​ຮັບ​ເອົາ​ມະ​ຫາ​ຊົນ​ຜູ້​ກ້າວ​ໜ້າ​ເຂົ້າ​ເປັນ​ສະ​ມາ​ຊິກ​ກຳ​ມະ​ບານ​ໃໝ່​ຂອງ​ໂຮງ​ງານ​ຊີ​ມັງ​ລາວ​ວັງ​ວຽງ ຫຼັງ III ເຊີ່ງ​ມີ​ທັງ​ໝົດ 12 ສະ​ຫາຍ, ຍິງ 1 ສະ​ຫາຍ. ຈາກ​ນັ້ນ, ສະ​ຫາຍ ວົງ​ເພັດ ວົງ​ວຽງ​ແກ້ວ ປ​ະ​ທານ​ກຳ​ມະ​ບານ​ຮາກ​ຖານ​ໂຮງ​ງານ ກໍ​ໄດ້​ຂຶ້ນ​ກ່າວ​ຮັບ​ພ້ອມ​ທັງ​ແນະ​ນຳ​ສິດ​ໜ້າ​ທີ່ ແລະ ການ​ເຄື່ອນ​ໄຫວ​ວຽກ​ງານ​ບາງ​ດ້ານໃຫ້​ແກ່​ສະ​ມາ​ຊິ​ກ​ກຳ​ມະ​ບານ​ໃໝ່​ ພ້ອມ​ທັງ​ປະກາດ​ການ​ຊັບ​ຊ້ອນ​ເຂົ້າ​ຈຸ​ໜ່ວຍ​ຕ່າງໆ ​ຢູ່ພາຍ​ໃນ​ໂຮງ​ງານ.

​ຕອນ​ທ້າຍ ໃນ​ພິ​ທີ​ຍັງ​ໄດ້​ຮັບ​ຟັງ​ການ​ໂອ້​ລົມ​ຂອງ​ ສະ​ຫາຍ ບົວ​ສອນ ແກ້ວ​ປະ​ເສ​ີດ ເລ​ຂາ​ໜ່ວຍ​ພັກ ຮອງ​ຫົວ​ໜ້າ​ໂຮງ​ງານ​ຊີ​ມັງ​ລາວ​ວັງ​ວຽງ ຫຼັງ III ຕື່ມ​ອີກ, ເຊີ່ງ​ກ່ອນ​ອື່ນ​ສະ​ຫາຍ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ຕໍ່​ມະ​ຫາ​ຊົນ​ຜູ້​ກ້າວ​ໜ້າ ທີ່​ໄດ້​ເຂົ້າ​ເປັນ​ສະ​ມາ​ຊິກ​ກຳ​ມະ​ບານ​ໃໝ່ ແລະ ໄດ້​ເນັ້ນ​ຄືນ​ກ່ຽວ​ກັບ 4 ຂໍ້​ຫ້າມ​ຢູ່​ໃນ​ມາດ​ຕາ​ທີ 11 ຂອງ​ສະ​ມາ​ຊິກ​ກຳ​ມະ​ບານ​ລາວ​ໃຫ້​ແກ່​ຜູ້​ທີ່​ເຂົ້າ​ເປັນ​ສະ​ມາ​ຊິກ​ກຳ​ມະ​ບານ​ໃໝ່​ໄດ້​ມີ​ຄວາມ​ຮັບ​ຮູ້ ແລະ ເຂົ້າ​ໃຈ​ຕື່ມ​ອີກ.