ຄະ​ນະ​ນຳ​ຂອງແຂວງ ລົງ​ຊຸກ​ຍູ້​ຕິດ​ຕາມ​ການ​ປ້ອງ​ກັນ​ການ​ແຜ່​ລະ​ບາດ ໂຄວິດ-19 ຢູ່​ເມືອງວັງ​ວຽງ

​ໃນວັນ​ທີ 30 ມີ​ນາ 2020 ນີ້ ຢູ່​ທີ່​ສະ​ໂມ​ສອນ​ໃຫຍ່​ເມືອງວັງ​ວຽງ ໄດ້​ຈັດ​ກອງ​ປະ​ຊຸມ​ປຶກ​ສາ​ຫາ​ລື​ການ​ຊີ້​ນຳ​ການ​ປ້ອງ​ກັນ​ການ​ແຜ່​ລະ​ບາດ​ພະ​ຍາດໂຄວິດ-19 ຂຶ້ນ ໂດຍ​ການ​ເປັນ​ປະ​ທານ​ຂອງ ທ່ານ ບຸນ​ເພັງ ສາຍ​ນໍ​ລະ​ດີ ຮອງ​ເລ​ຂາ​ພັກ​ແຂວງ ປະ​ທານ​ສະ​ພາ​ປະ​ຊາ​ຊົນ​ແຂວງວຽງ​ຈັນ, ທ່ານ ບຸນ​ຈັນ ມາ​ລາ​ວົງ ເລ​ຂາ​ພັກ​ເມືອງ ເຈົ້າ​ເມືອງໆ​ວັງ​ວຽງ ພ້ອມ​ດ້ວຍ​ຄະ​ນະ​ສະ​ເພາະ​ກິດ​ຂັ້ນ​ເມືອງ, ມີ​ບັນ​ດາ​ຫົວ​ໜ້າ​ຫ້ອງ​ການ​ຕ່າງໆ ຢູ່​ພາຍ​ໃນ​ເມືອງ​ເຂົ້າ​ຮ່ວມ.

ກອງ​ປະ​ຊຸມ​ຄັ້ງ​ນີ້​ໄດ້​ຟັງ​ການ​ລາຍ​ງານ​ຂອງ​ທ່ານ ບຸນ​ຈັນ ມາ​ລາ​ວົງ ເຈົ້າ​ເມືອງ​ໆ​ວ​ັງ​ວຽງ ທັງ​ເປັນ​ຫົວ​ໜ້າ​ສະ​ເພາະ​ກິ​ດ​ຂັ້ນ​ເມືອງ​ກ່ຽວ​ກັບ​ການ​ເຄື່ອນ​ໄຫວ​ຊີ້​ນຳປະ​ຊາ​ຊົນ​ຢູ່​ເມືອ​ງວັງ​ວຽງ ໃນ​ການ​ຮ່ວມ​ແຮງ​ຮ່ວມ​ໃຈ​ຕ້ານ ແລະ ສະ​ກັດ​ກັ້ນ​ການ​ແຜ່​ລະ​ບາດ​ພະ​ຍາດ​ໂຄວິດ-19 ຢູ່​ພາຍ​ໃນ​ເມືອງ ເຊີ່ງ​ໄລ​ຍະ​ຜ່ານ​ມາ​ທາງ​ເມືອງ​ໄດ້​ຈັດ​ຕັ້ງ​ຄະ​ນະ​ສະ​ເພາະ​ກິດ​ລົງ​ໂຄ​ສະ​ນາ​ເຜີຍ​ແຜ່​ສຸ​ຂະ​ສຶກ​ສາ​ໃຫ້​ແ​ກ່​ພະ​ນັກ​ງານ, ທະ​ຫານ, ຕຳຫຼວດ ແລະ ພໍ່​ແມ່​ປະຊາ​ຊົນ​ຢູ່​ພາຍ​ໃນ​ເມືອງ ເພື່ອ​ໃຫ້​ມີ​ຄວາມ​ຮັບ​ຮູ້​ເຂົ້າ​ໃຈ​ຕໍ່​ຜົນ​ຮ້າຍ​ຂອງ​ພະ​ຍາດ ໂຄວິດ-19 ແລະ ວິ​ທີ​ປ້ອງ​ກັນ. ນອກ​ຈາກ​ນີ້ ທ່ານ​ຍັງ​ໄດ້​ລາຍ​ງານ​ກ່ຽວ​ກັບ​ການ​ຕ້ອນ​ຮັບ​ແຮງ​ງານ​ລາວ​ທີ່​ໄປ​ອອກ​ແຮງ​ງານ​ຢູ່​​ຕ່າງປະ​ເທດ​ກັບ​ຄືນ​ບ້ານ​ເກີດ​ເມືອງນອນ​ຂອງ​ຕົນ ເຊີ່ງ​ທາງ​ເມືອງ​ໄດ້​ມີ​ສູນ​ຮອງ​ຮັບ​ໃຫ້​ເຂົາ​ເຈົ້າ​ກັກ​ຕົວ​ເປັນ​ເວ​ລາ 14 ວັນ ໂດຍ​ມີ​ແຮງ​ງານ​ທີ່​ມາ​ແຕ່ຕ່າງ​ປະ​ເທດ​ທັງ​ໝົດ 107 ຄົນ ແລະ ໄດ້​ຈັດ​ຕັ້ງ​ແພດ​ໝໍ​ປະ​ຈຳ​ໃນ​ການ​ຕິດ​ຕາມກວດສຸ​ຂະ​ພາບ​ການ​ແຜ່​ລະ​ບາດ​ຂອງ​ເຊື້ອ​ໄວ​​ຣັດ​ດັ່ງ​ກ່າວ ເພື່ອ​ລໍ​ຖ້າ​ໃຫ້​ຄົບ​ຕາມ​ກຳ​ນົດ. ຕໍ່​ບຸກ​ຄົນ​ທີ່​ບໍ່​ມີ​ອາ​ການ​ກໍ​ຈະ​ໄດ້​ເຮັດ​ໃບ​ຢັ້ງ​ຢືນ​ທາງ​ການ​ແພດ​ໃຫ້​ກັບ​ບ້ານ​ຫາ​ຄອບ​ຄົວ​ຂອງ​ເຂົາ​ເຈົ້າ.

ຈາກ​ນັ້ນ ທ່ານ ບຸນ​ເພັງ​ ສາຍ​ນໍ​ລະ​ດີ ຮອງ​ເລ​ຂາ​ພັກ​ແຂວງ ກໍ​ໄດ້​ມີ​ຄຳ​ເຫັນ​ຊີ້​ນຳ​ໃຫ້​ກວດ​ກາ​ຄືນ​ມະ​ຕິ​ຄຳ​ສັ່ງ​ຕ່າງໆ ຂອງ​ຂັ້ນ​ເທິງ​ແຕ່​ລະ​ສະ​ບັບ​ກ່ຽວກ​ັບ​ການ​ຕ້ານ ແລະ ສະ​ກັດ​ກັ້ນ​ການ​ແຜ່​ລະ​ບາດ​ພະ​ຍາດ ໂຄວິດ-19 ທີ່​ໄດ້​ກຳ​ນົດ​ອອກ ເພື່ອ​ຈັດ​ຕັ້ງ​ຜັນ​ຂະ​ຫຍາຍ​ໃຫ້​ມີ​ປະ​ສິດ​ທະ​ຜົນ. ນອກ​ນີ້ ທ່ານຍ​ັງ​ໄດ້​ຊີ້​ກ່ຽວ​ກັບ​ການ​ເຄື່ອນ​ໄຫວ​ວຽກ​ງານ​ຂອ​ງ​ຄະ​ນະ​ສະ​ເພາະ​ກິດ​ທີ່​ຖືກ​ແຕ່ງ​ຕັ້ງໃນ​ການ​ລົງ​ໄປ​ຊີ້​ນຳ ໂຄ​ສະ​ນາ​ໃຫ້​ໜ່ວຍ​ພັກ, ອ​ຳ​ນາດ​ການ​ປົກ​ຄອງ​ບ້ານ​ໃນ​ທົ່ວ​ເມືອງ​ໃຫ້​ເຫັນ​ໄດ້​ຄວາມ​ສຳ​ຄັນ ແລະ ຄວາມ​ຈຳ​ເປັນ​ໃນ​ການ​ເປັນ​ເຈົ້າ​ການ​ຕ້ານ​ສະ​ກັດ​ກັ້ນ​ການ​ແຜ່​ລະ​ບາດ​ຂອງ​ໄວ​ຣັດ​ດັ່ງ​ກ່າວ ເພື່ອ​ປຸກ​ລະ​ດົມ​ປະ​ຊາ​ຊົນ​ທັງ​ໝົດ​ຢູ່​ພາຍ​ໃນ​ບ້ານ​ເຂົ້າ​ຮ່ວ​ມ​ຢ່າງ​ຕັ້ງ​ໜ້າ ແລະ ເປັນ​ເຈົ້າ​ການ ແລະ ກວດ​ກາ​ຄືນ​ຄົນ​ເຂົ້າ-ອອກ​ບ້ານ​ຢ່າງ​ເຄັ່ງ​ຂັດ ໂດຍ​ສະ​ເພາະ​ແຮງ​ງານ​ທີ່​ເດີນ​ທາງ​ມາ​ແຕ່​ຕ່າງ​ປະ​ເທດ, ເອົາ​ໃຈ​ໃສ່​ຄວມ​ຄຸມ​ລາ​ຄາ​ສິນ​ຄ້າ​ໃຫ້​ຢູ່​ໃນ​ສະ​ພາບ​ປົກ​ກະ​ຕິ, ຕິດ​ຕາມ​ແກ້​ໄຂ​ຂໍ້​ມູນ​ຂ່າວ​ສານ​ຕ່າງໆ ທີ່​ກຸ່ມ​ຄົນ​ບໍ່​ດີ​ສ້າງ​ຂຶ້ນ​ເພື່ອ​ປັ່ນ​ປ່ວນ​ສັງ​ຄົມ​ໃຫ້​ທັນ​ການ. ຈາກ​ນັ້ນ ທ່ານ​ຍັງ​ໄດ້​ຮ່ວມ​ເດີນ​ທາງ​ໄປ​ກັບ​ຄະ​ນະ​ສະ​ເພາະ​ກິດ​ຂອງ​ເມືອງ ເພື່ອ​ລົງ​ໄປ​ກວດ​ກາ​ຕິດ​ຕາມ​ເບີ່ງ​ການ​ປະ​ຕິ​ບັດ​ໜ້າ​ທີ່​ວຽກ​ງານ​ກຽມ​ຄວ​າມ​ພ້ອມ​ຂອງ​ແພດ​ໝໍ ແລະ ສະ​ຖານ​ທີ່​ກັກ​ຕົວ​ຂອງ​ແຮງ​ງານ​ທີ່​ມາ​ແຕ່​ຕ່າງ​ປະ​ເທດ​ຕື່ມ​ອີກ.